Sérkennsla

Leikskólinn Hulduheimar starfar samkvæmt lögum um leikskóla og Aðalnámskrá leikskóla frá 2011 þar sem kveðið er á um að sérfræðiþjónusta sveitarfélaga skuli stuðla að jafnrétti til náms og vellíðan allra barna. Öll börn eiga að njóta bernsku sinnar sem best er á kosið, miðað við þroska og þarfir hvers og eins. Lögð er áhersla á snemmtæka íhlutun og því er vel fylgst með þroska og líðan barna með það að markmiði að veita viðeigandi inngrip sem fyrst.

Sérkennslustjóri hefur yfirumsjón með allri sérkennslu í leikskólanum og vinnur í samstarfi við sérkennara, deildarstjóra og skólastjórendur. Gerðar eru einstaklingsnámskrár með þeim börnum sem þurfa sérstuðning og teymi eru mynduð utan um þau. Sérkennslustjóri sér um að boða foreldra og viðkomandi aðila á teymisfundi. Sérstuðningur fer fram innan sem utan deilda.

Sérkennslustjóri sér einnig um samskipti við skólaþjónustu Árborgar og aðra utanaðkomandi ráðgjafa sem koma að málefnum barna með sérstuðning. Hann er jafnframt tengiliður farsældar.

Ráðgjafateymi skólaþjónustunnar (ásamt fulltrúa frá HSU) fundar reglulega með sérkennslustjóra og aðstoðarleikskólastjóra og veitir þar ráðgjöf um einstaka mál. Þessir fundir kallast lausnarteymisfundir.

Starfslýsing sérkennslustjóra

Sérkennslustjóri Árbæjar vinnur skv. verklýsingu sérkennslustjóra.
NÆSTI YFIRMAÐUR: Leikskólastjóri.
STARFSSVIÐ: Starfar samkvæmt lögum og reglugerð um leikskóla, lögum um málefni
fatlaðra, öðrum lögum er við eiga, aðalnámskrá leikskóla og stefnu viðkomandi sveitarfélags.
MEGIN VERKEFNI:
Stjórnun og skipulagning:

Ber ábyrgð á og stjórnar skipulagningu, framkvæmd og endurmati sérkennslunnar í
leikskólanum ásamt leikskólastjóra.
Er faglegur umsjónarmaður sérkennslu í leikskólum, annast frumgreiningu og ráðgjöf til
annarra starfsmanna leikskóla
Ber ábyrgð á miðlun upplýsinga milli sérkennsluráðgjafa/sérkennslufulltrúa leikskóla og
starfsmanna leikskólans.
Hefur umsjón með uppeldis- og námsgögnum leikskólans sem tengjast sérkennslu.

Uppeldi og menntun:

Ber ábyrgð á að börnum sem njóta sérkennslu í leikskólanum sé boðið upp á
þroskavænleg verkefni.
Hefur yfirumsjón með gerð verkefna og ber ábyrgð á gerð einstaklingsnámskráa fyrir börn sem njóta sérkennslu.
Hefur yfirumsjón með að áherslum um kennslu annarra sérfræðinga sé framfylgt í leikskólanum og að skýrslur séu gerðar.

Foreldrasamvinna:

Vinnur í nánu samstarfi við foreldra/forráðamenn barna sem njóta sérkennslu í leikskólanum og situr fundi og viðtöl með þeim.
Veitir foreldrum/forráðamönnum barna sem njóta sérkennslu stuðning, fræðslu og ráðgjöf.
Situr foreldrafundi sem haldnir eru á vegum leikskólans.

ANNAÐ:

Ber að hafa náið samstarf við sérkennsluráðgjafa og aðra sérfræðinga sem tengjast leikskólanum vegna barna sem njóta sérkennslu.
Situr fundi þar sem fjallað er um málefni barna sem þurfa sérfræðiaðstoð eða sérkennslu í leikskólum samkvæmt boðun yfirmanns eða hlutaðeigandi aðila.
Situr starfsmannafundi og aðra fundi er yfirmaður segir til um og varða starfsemi leikskólans.
Sinnir þeim verkefnum er varða sérkennslu sem yfirmaður felur honum.

Skólaþjónusta Árborgar

Ráðhúsinu, Austurvegi 2 | 800 Selfoss
mánudaga - föstudaga kl. 9:00 - 16:00
480 1900
skolathjonusta@arborg.is

Skólaþjónusta Árborgar er sérfræðiþjónustu við leik- og grunnskóla í sveitarfélaginu. Leiðarljós skólaþjónustunnar er að þjóna fjölbreyttum þörfum barna, foreldra og starfsfólks. Þjónustan fer að mestu fram í skólunum en starfsfólkið hefur skrifstofu- og fundaraðstöðu í Ráðhúsi Árborgar. Mikil áhersla er lögð á samstarf ýmissa ráðgjafa og fagaðila sem koma að þjónustu við börnin í Árborg.

Nánari upplýsingar um skólaþjónustuna